Pages

Saturday, December 24, 2011

خليكوا فى حالكوا

من زمان وانا بنت متحفظة جدا فى تعاملاتى مع الناس مش غرور ولا حاجة لا سمح الله بس انا بشوف أن كده أحسن ليه أحشر نفسى ف حياة ناس بدورهم هيحشروا نفسهم ف حياتى :) وما باحبش اللت والعجن بمعنى أصح نميمة البنات اللى هى عبارة عن ملخص حياة ناس كتير ماليش دعوة بحد فيهم يبقى ليه أجيب سيرتهم بالعقل يعنى ؟؟؟؟!!!
ليه لازم كل واحد يقعد يدور وينخور ف اسرار جيرانه او صحابه عشان يرضى فضوله اللعين ماباقولش ان الناس ماتسألش على بعض او تطمن على بعض  بالعكس نسأل ونطمن بس بالأصول ومش لدرجة الرخامة اللى تخلى اللى قدامك عايز يلطشك قلم يفوقك ويقولك خليك ف حالك يارخم وأنا من موقعى هذا بأقول لكا الحشريين اللى مناخيرهم أطول من سمكة ابو سيف خليكوا ف حالكوا وعلى رأى المثل اللى يتحشر فى اللى مالوش فيه يلقى اللى مايلدش عليه D: .... والسلام ختااااااام

Wednesday, February 23, 2011

My biggest dream :)

One day i will fly away leaving all this to yesterday.
Really I am wishing to go in my dream trip to Paris please Allah make my dream come true  pleaaaaaaaaaaaaase <3<3<3

Monday, February 21, 2011

نـفـــــســــى أطــــــــيــــــــــــــــــــــــــــــــــــر ........

ساعات الواحد بيبقى نفسه يعمل حاجات مش طبيعية يعنى مثلاً لما تشوف فيلم سوبر مان أكيد ساعتها بتفكر ياااااه لو كنت أقدر أطير زيه وقوى زيه أو لما تشوف فيلم سبايدر مان ياسلام بيبقى الواحد عاوز يدخل يمثل هو الفيلم ويقدر يتنطط أوى كده ويمشى ع الحيط للحظة ممكن نتخيل أن الفيلم ده حقيقة لو سبنا نفسنا مع الفيلم مش بعيد نلاقى أيدينا ورجلينا وتعابير وشنا بتقلد البطل حتى لو ماإتحركناش بس التعبير نفسه بيبقى شبيه باللى ف الفيلم .

 

ناس كتير ممكن تعتبر ده جنون أوشغل عيال طب وماله ما الناس بتلاقى فى خيالها كل الأمنيات العقلانية اللى ممكن تتحقق والخارقة اللى تعتبر خيال يمكن لأن الخيال حر يعنى مثلاً لما حد يكون فرحان أوى يقول أنا طاير من الفرحة ولما حد بينط من مكانه ولو للحظة ف اللحظة دى فعلا بيكون طاير ف الهوا حتى ولو للحظة.


أنا من زماااااان نفسى أطير أه نفسى أطير مش أركب طيارة لأ أنا نفسى جسديا اأطير وفعلا بحاول أطير إستنوا أنا ماإتجننتش أنا بأطير بخيالى وجربوها وشوفوا مقدار الحرية اللى هتحسوه وقد ايه هتعيشوا لحظة هدوء وارتياح نفسى .


اللى عنده إستعداد يجرب يعمل الخطوات اللى جاية:-

أولاً :تصحوا بدرى يعنى مثلا فى حدود الساعة سبعه كده بحيث يبقى فى شمس منورة الدنيا.


ثانياً:إفتحوا الشباك أو البلكونة اللى موجود عندكم ف الأوضة.


ثالثاً:أقفوافى الشباك وغمضوا عنيكم لمدة نص دقيقة وإياك حد يغش ويفتح وإياك حد ينام تانى :) .


رابعاً:إفردوا إيديكوا أيوة زى تيتانيك الله ينور عليكم وخدوا نفس عمييييييق جدا جدا إملوا الرئتين بهوا الصبح الدافى وأنتوا مغمضين .


وأخر خطوة وأهم خطوة التخيل يعنى حد ممكن يتخيل نفسه بينط من فوق البرج وينزل واقف على رجليه حد تانى يتخيل أنه طاير زى العصفورة وهكذا أنا عن نفسى بأتخيل أنى طيارة ورق أه إيه المشكلة طيارة ف الهوا مافيش ليها حدود ولا حد قيد مالهاش خريطة تمشى عليها الهوا اللى بيحركها لا قواعد وظروف ولا عادات ولا أى حاجة تحكمها  الهوا بس اللى مسيطر عليها مقدار مالوش حد من الحرية مش مهم أنى أقدر أطير بجد مش مهم أنى مش هقدر أطير بس المهم إن عندى أمل وبأحلم وبجد بجد بجد بجد

نفـــســــــى اطــــــــــــــيـــــــــــر...........


Friday, February 18, 2011

فنجـــــــــــان قهــــــــوة

في الجو البارد من فصل الشتــاء
يحلو لي الجلوس خلف نافذة المنــزل
والتأمل في السمــاء.


تلك الليلة المـــاطرة..
جلست على الأريكة
ووضعت المدفأة أمـــامي
كنت أنظر الى قطـــرات المطــر المترامية على الأرض
وأنصــت لهــا قطــرة قطـــرة
فمع كل قطــرة أشعــر بالسكينة والهدوء
فالهـــدوء الـــرائع يخيـّـم على الشوارع
وكـــأن الجميــع نِـيــام.


في تلك اللحظة.......
خطر على بالــي أن أحتسي كــوباً من القهوة الدافئـــة
فنهضت من مكانــي كــي أحضّــر القهــــوة
وضعــت ابريق المـــاء على الفرن وبقيت انظـــر من النـــافذة
تارةً أسمع صوت قطرات المطـــر المنسابة على الأرض بهـــدوء
وتـــارةً أخرى أسمــع صـــوت الماء يتطاير من الابريـــق
بعد دقائق غلى الماء فأضفت اليه ملعقة من السكـــر
وملعقتين من البن
ثم تذوقت الطعــم
لكني أحسست بطعم
مـــرّ
فاحترت هل أضيف المزيد من السكر أم ماذا ؟؟


أيهما ألذ في هذه اللحظة??
القهوة المــرّة أم الحلوة ؟؟

فالبارحة أحببتها وهي مـــرّة
أما اليوم فيبدو أنني بحاجة للمزيد من السكـــر
تعجبت وقلت في نفسي ..غريب هذا الفرق الشاسع بين الأمـــس و اليــــوم
فأنــــا ما زلت كما أنــــا.


فلمــــاذا هذا الاختلاف في الـــذوق؟؟
أجـــــل أخـــوآتي ..تلك هي حيـــــاتنا
أشبه بفنجـــــان قهــــوة
احياناً نشربها حلــــوة المــــذاق
وأحياناً أخرى نضطـــر رغمـــاً عنــّــا أن نشربهــا مـــرّة.


قد تسأل لمـــاذا ؟؟
لانّ الأيام هكذا....

" يــــوم لــــك ويـــــوم عليـــــك "


ولحظتها نمضي ساعاتنا بين الألم واليأس
تتثاقل علينا الاحزان شيئاً فشيئاَ
إلى أن ترجح كفة الحزن على كفة السعادة
وعندها نغلق الباب على أنفسنا....


ونعلن النهاية..............
                                                           نقلاً من :Love is life 
                                                           بقلم :قــــ ـالعقول ــــــــوت

Thursday, February 17, 2011

اصعب وقت

اصعب وقت لما تكون محتار بين قرارين واللى بيصعبه اكتر ان القرارين لو اخترت اكيد هتخسر حاجه ف الحالتين....


الدنيا بتضيييق اوى وكأن النفس بيخرج بالعافية وفى حيرة وقلق وخوف من بكرة ويمكن انا مش عارفة اخد قرار لانى كرامتى وجعانى من شخص ما يمكن عشانى تفكيرى كله متركز ف نقطة واحدة يمكن انا اللى غلطانة من الاول ميت الف يمكن دايرة جوا دماغى وميت الف لو كنت عملت كذا كان هيحصل اية ؟؟؟؟....
حالتى بالظبط عاملة زى طالب ثانوية عامة اللى محتار ادخل علمى ولا ادبى احسن ؟؟؟


هل الاحسن انى اضحى بشخص ف حياتى غالى عليا عشان كرامتى انجرحت منه و بسببه ؟؟؟ هل لو اختارت ده هاستحمل حياتى وهبقى راضية؟؟؟
ولا استنى اعتذار وشعور صادق بالندم واتنازل عن زعلى ؟؟؟ هل كده هبقى باهدر كرامتى وباتنازل عن حقى؟؟؟


قرأت فى صفحة love is life نقلا عن قــ العقول ــوت
على الفيسبوك الاتى:
القرارات
بعضها لا بل أغلبها يكون لها التأثير في جل حياتنا
يقلبها رأسا على عقب ويغير من مجرها
قد نتحتاج إلى نصائح من حولنا لنستطيع إتخاذها
وقد نكون قادرين على إتخاذها بمفردنا
...فهي قرارات صعبه بحد ذاتها
وكأنها الفاصل بين الحياه والموت
ليس حقيقةً ولكــــن لأهميتها ،،






مافيش ف ايدى غير انى افكر بهدوء وادعى ربنا يهدينى للقرار الصح يااااااااااااااااااااارب اهدينى للصواب....

Monday, February 14, 2011

إنتصرنا إنتصرنا إنتصرنا

دايماً كنت باقول جملة (انتصرنا انتصرنا انتصرنا )لما يحصلى موقف اتظلم فيه من حد او يكون ليا حق ومش معترف بيه كنت اول مااخد حقى اغنى الجملة دى بينى وبين نفسى وساعات بصوت لما باكون اتظلمت اوى وربنا رجعلى حقى من اللى ظلمنى ...


حسيت نفس الاحساس ده لما قريت ف تويتر ان الريس هيقول خطاب يوم الخميس بقيت متأكده انه هيتنحى اه والله زى مااكون قاعده معاه ف القصر وقالى ياسماح يابنتى انا زهقت وهسيب البلد :) المهم شوفت الخطاب وللاسف الشديد بعد امنيات كتير انه خلاص هيتنحى ويمشى لوحده رجع يقول هاصحح معرفش ايه واعدل معرفش ايه واعاقب مين ومين ومين طب مانت حكمت عمر كبير ماعملتش كل ده ليه ولا هو انت من الناس اللى ماتفتكرش ربنا الا وقت غرقة المهم ان الناس اللى ف التحرير وكل المؤيدين للثورة ماعجبهمش الكلام ده وعندهم حق.....


تانى يوم اللى هو الجمعه 10\2\2011 المظاهرات كانت كتير وف اماكن مختلفة فى مصر وكلها بتطالب برحيل مبارك وناس ف التليفزيون قالوا انهم هيتجهوا لقصر الرياسة لإجبار الريس (سابقاً) ع الرحيل ساعتها عرفت واتاكدت انه هيمشى ميسيب البلد ده اذا ماكانش فعلا سابها ف الوقت ده وبصراحة ده الحل الاوحيد عشان الاوضاع تستقر فكتبت من باب الأمل ان التاريخ يكتب ويقول(هكذا رحل محمد حسنى مبارك عن مصر) المهم ان خلال ساعتين اتنين بالظبط لقينا نائب الرئيس السيد عمر سليمان بيعلن تنحى الرئيس مبارك عن الرئاسة وتولى القوات المسلحة زمام الامور ف اللحظة دى مابقتش عارفة انا حاسه ايه انا فرحانة ولا زعلانه حاسة بالظلم ومقهورة ولا مبسوطة بحرية بلدى وفرحة الناس واهالى الشهدا بتحقيق امل اولادهم ف بلد حر وديمقراطى ...


كانت خلطبيطة بالصلصة جوايا بس فجأه لقيتنى باغنى بصوت الى (وانتصرنا انتصرنا انتصرنا )وحسيت بحرية غريبة اينعم بابا وماما كانوا منقوطين منى عشان صوتى عالى بس فعلا كنت مبسوطة وف نفس الوقت خايفة وقلقانة تغيييييييييييير جذرى من يوم مااتولدت ومبارك رئيس مصر حسيت بفرق غير عادى بمجرد سماعى للخبر ويارب بجد اللى جاى يكون احسن بكتير ان شاء الله ....


استلمت القوات المسلحة مقاليد الدولة لتسيير الامور على ماتتكون حكومة جديدة وتكون فى انتخابات نزيهة وقرر المجلس الاعلى للقوات المسلحة حل مجلسى الشعب والشورى تماما وبقاء الحكومة الحاليه مؤقتا لحد ماتتشكل حكومة تفيد الشعب بجد .....


امبارح عرفت ان الرئيس السابق لينا محمد حسنى مبارك مريض وان حالته الصحية بتتدهور بشكل كبير اقولكوا الحق انا زعلت عشانه وزعلت اكتر لما لقيت ناس شمتانه فيه مستحيل شباب وبنات مصر اللى عملواالثورة حققوا تغيير ونضفوا الميدان وحمونا من البلطجيه والحرامية يشمتوا ف المرض اتمنى من ربنا انه يشفيه ويزيل عنه المرض ويغفرله واتمنى ان كل الناس تدعيله لأن دلوقتى صفته مش رئيس مصر لأ صفته دلوقتى انسان مريض يستحق الدعاء....


واخر حاجة دعوة صافية من القلب ان ربنا يرحم كل الشهداء اللى ضحوا بنفسهم عشان احنا نعيش مستقبل احلى ويصبر اهلهم ويلهمهم الصبر وتحية منى ليكوا لان عمرنا ماهننسى فضلكم علينا . . . . . .

إهداء لأرواح شهداء الثورة عمرنا ماهننسى فضلكم ربنا يرحمكم

Friday, February 11, 2011

كلاكيت تالت مرة

ولتالت مرة على التوالى نقول كلاكيت
بعد انتظار طويل اعلنوا ان الريس هيقول خطاب الساعة 10 واختلفت الاقوال والتوقعات عن ياترى خلاص الريس اقتنع بوجهة نظر الشعب اللى هو ممثله وقرر التنحى بكرامه او انه هيطلع يقول كلام غير مفهوم وبرضو يفضل ف مكانه وكأنه عايش ف بلد تانيه.
وجت الساعة عشرة وبقت عشرة وعشرة على ما الخطاب اتذاع الخطاب اشتمل شوية نقط
اولاً:انه يعزى الاهالى الشهداء اللى اتوفوا .
ثانياً: استعطاف الشعب بكل الطرق الممكن من اساليب الحوار السياسيه البحتة عن انه هيحاسب ويعاقب كل اللى اتسبب ف الاذى للناس واللى اتسبب ف الدم جوا الميدان وبراه ده على ماافتكر ياخد قرار وكأنه ماكانش عارف ايه اللى بيحصل .
ثالثاً: قرار بتعديل المواد 77و78و88 الخاصة بالترشح للرئاسة والقوانين اللى تحكمها وألغاء المادة179 الخاصة بقانون الطوارىء وبكده قانون الطوارىء يتلغى.
رابعاً: محاوله استدرار عطف الشعب بتحويل معظم المهام الدستورية الى نائبه اللواء:عمر سليمان وانه بس موجود صورة لحد ماتيجى انتخابات سبتمبر ويعمل اللى ف دماغه.
والخلاصة دلوقت ان الناس لسه برضو مش مصدقاه وشباب التحرير شايفين ان الكلام مش واضح ومش صريح بيالظبط نتبع طريقة ودنك منين ياجحا وللاسف النتيجه هتبقى مؤذية لكل الاطراف لو الناس اللى ف التحرير اتوجهوا لقصر الرياسة بكرة هتبقى مجزرة بكل ما للكلمة من معنى .
ياسيادة الريس كلمة منى ليك لو لسه شايف ان البلد دى بلدك وان شعبها اهك وانك لسه ف قلبك حب ليها وخوف عليها ارحل من مكانك ف الحال واعلنها للعالم كله بكل صراحة انا هاتنحى وارضى شعبى شعب مصر بلدنا كلنا قبل ماتخرب يمكن التاريخ يقول ف حقك حاجة كويسة عنك غير انك كنت صاحب اول ضربة جوية طول 30 سنه حكم لمصر تفتكر ده كفاية فى حق التاريخ اتمنى من ربنا ان بكرة يعدى على خير وماحدش يتأذى بكرة وربنا يحل الاومة دى من عنده ويهدينا ويهديك ياريس للتصرف الصح .