أنا مين؟؟؟

إزيكم احب اعرفكم بنفسى انا(( سماح)) حدوتى تبتدى إن انا بنت وحيده على 3 صبيان وانا اصغر واحدة فيهم دنيتى بسيطة جدا والحمد لله.
طبعا أنا دلوعة بيتنا وبابا بس ف نفس الوقت بميت راجل والدلع عندنا مش بوظان بالعكس بابا كان دايما يقولى انتى ف وسط رجالة ولازم تبقى حنينة ويكونلك شخصية عشان ابقى مطمن عليكى كان دايما مدلعنى جداجدا لدرجة ان ماما كانت بتقول انى ضرتها D: بابا حنين اوى ومن الناس اللى ترتحلها لما تقابلها بيفهم ف الاصول والواجب كويس اوى وعلمنى انا واخواتى منها كتير والحمد لله .
نيجى بقى للست الوالدة مامتى حبيبتى طيبة جدا جدا وبشوشة مع الناس حنينة بجد بس لما ابقى مش عاملة بلوة مسيحة وما اكثرهم احياناً صحابى مش بيصدقوا انها مامتى من كتر ماهى بشوشه ومرحة مش قتمه زيى :)
اخواتى حبايبى ومن الكبير للصغير ((حسام يليه عبد الرحم يليه محمد )) اقرب ناس ليا دايما ماما تقولى دول سندك ف الدنيا من بعدنا دول ضهرك اللى تسندى عليه وحاجات كتير زى دى وانا باحب اخواتى اوى اوى مع اننا بنتناقر كتيييير بس ده اكيد دليل للمحبة وان احنا مانقدرش نستغنى عن بعض ربنا يخليهم ليا ويخلينى ليهم.

أنا بقى اتخرجت فى سنة 2011 من كلية بيقولو عليها حلوة يعنى الى حد ما كنت بحبها (تجارة انجليزى او زى الشباب المتأنتك بيقول تجارة إنجلش ) وتقديرى جيد جدا ولا زلت ابحث عن شغل لحد دلوقتى والحمد لله ادعولى بقى ربنا يكرمنى .

 قررت اعمل مدونة عشان احياناً باكتب كلام كويس وبلاقى كلام كويس فى اماكن كتير فقولت احفظه يمكن حد يستفيد بيه وطبعا هاكتب اسم صاحب او صاحبه الكلام لو نقلت اى كلام عن اى حد معنا حقوق النشر والطبع محفوظة :)

أدى كل الحكايه أتمنى تنورونى وتشرفونى ف المدونةدى خلاصه حياتى حياة بسيطه جدا ويارب تفضل كده على طول ونفضل كده نحب بعض ف عيلتنا الصغنونة الجميله ويديمنا لبعض قولوا أمييييييييييييييييييييييييييييييييييييييييييييييييييييين :)